نبض الحروف متوضي من بحر الألم
و دموع بيبكيها القلم
من فوق ورق فيه السطور
ضلوع بيكويها اصطبار
مستني نور الفجر يطلع سوسنات
و الأرض مافيهاش شبر ينفع للصلا
و بلال بقاله سنين بينده ع القلوب
لحد ما حسه اتنبح
بس الشيطان
مش ناوي لو ثانية يتوب
واقف قصاده
بيشرب الخمرة ف جماجم ورد كان
عايز يفتّح للأدان
كل التراب ع الأرض
كان سد الودان
و النيل بيرقص رقصة العطشان لحضن
عروسة ترويه
بالعيال
بحر الجماجم موجه عتمة
و أعلى من رقب الجمال
و مراكب الشمس اللي غرقت
ف التاريخ
طرحت قلوعها نجوم كتير اتوزعت
ف بلاد ما نعرفهاش قوي
مع انهم
بيقولوا دايما انهم
من دمنا
ولاد عمنا
بالحق مرة و ألف مرة بالضلال
و أنا يا اللي غرقان في الشقا
لسايا حابي ف الهموم
و جدي حابي
ريقه ناشف من زمان
و كل يوم
طوابير توديه لليمين
و غيرها تاخده للشمال
نبض الحروف اللي اتروت
من هم اتقل م الجبال
طرحت قصايد بكر فوق
سطر الأمل
و العين بتلمحهم عرايس
حسنهم من روح ايزيس
واقفين على كف الورق
يقروا تراتيل الحياة
و يرجعوا الإحساس لإسم اتقطعت
منه المعاني الطيبة
أو
زو ريس
و يعطروه بكفوف آتون
يضحك
قوي
و الضحكة تطرح ألف حورس للي جاي
و الشمس تتفتح ورود
و الأرض تطرح أغنيات
تطرد سواد الجهل من قلب البشر
بشموع هاتكتب ع الطريق
مافيش محال
ليست هناك تعليقات:
إرسال تعليق